Prej vitit 2024, një 41-vjeçar nga Vlora dyshohet se i ka bërë presion dhe ka kërcënuar vazhdimisht një 73-vjeçar, për t’i marrë një shumë parash. Shkak ishte një borxh që ai pretendonte se ia kishte djali i të moshuarit, por në vend që ta zgjidhte çështjen në rrugë ligjore, dyshohet se zgjodhi kërcënimet për të marrë lekët.
I lodhur nga presioni i vazhdueshëm, 73-vjeçari vendosi të kërkonte ndihmë dhe denoncoi rastin. Pas hetimeve, u identifikua si i dyshuar 41-vjeçari Ilir Sherifaj, banues në Vlorë, i cili u arrestua. Sipas të dhënave, ai rezulton me precedentë penalë të mëparshëm për krime kundër personit.
Tashmë, 41-vjeçari do të përballet me drejtësinë për akuzën e shtrëngimit me anë të kanosjes ose dhunës për dhënien e pasurisë. Për dy vite me radhë, i moshuari dyshohet se është përballur me kërcënime për një borxh që pretendohej se i takonte të birit, duke e kthyer çështjen e parave në një presion të vazhdueshëm ndaj tij.
