Ish-drejtoresha e Shërbimit Informativ Shtetëror, Vlora Hyseni, do të paraqitet nesër në ambientet e SPAK, ku do të merret në pyetje në kuadër të hetimit që po zhvillohet nga Prokuroria e Posaçme.
Sipas njoftimit të SPAK, Hyseni do të paraqitet në orën 12:00.
Pak orë më herët, në orën 09:00, do të paraqiten për t’u marrë në pyetje edhe dy persona të tjerë të së njëjtës dosje, punonjësi i Policisë së Shtetit, Fatjon Kalluçi, dhe biznesmeni Embro Sulejmani.
Për Vlora Hysenin është caktuar masa e sigurisë “arrest në shtëpi”, ndërsa ndaj Fatjon Kalluçit dhe Embro Sulejmanit është caktuar “arrest në burg”.
Në kuadër të hetimeve, agjentët e BKH-së kanë kryer kontrolle në disa ambiente dhe banesa, ndërsa dosja është pjesë e një hetimi më të gjerë të SPAK.
Hetimet vijojnë për të zbardhur rrethanat e çështjes dhe rolin e personave të përfshirë. Ndërkohë, përgjegjësia penale e tyre do të përcaktohet nga gjykata në përfundim të procesit.
