Autoriteti i Komunikimeve Elektronike dhe Postare (AKEP) i kërkoi kompanisë “Vodafone” që të luante një mesazh zanor nga Kryeministri Edi Rama.
Kjo duhet të bëhej përpara çdo telefonate dalëse ose hyrëse gjatë Marsit – kohë kur sapo u shfaq COVID-19 në vend.
Kjo u konfirmua nga kryetari i AKEP Tomi Frashëri, në parlament, të enjten.
“Në mungesë koordinimi, kryeministri propozoi që të bënte mesazhin e tij vokal.
Ky ishte për sensibilizim dhe vetë kryeministri me miratimin e operatorëve kërkoi që të ishte e kufizuar në kohë, vetëm për fundjavën.
Nuk ka rregullore ligjore në asnjë vend për të përcaktuar se cilat autoritete mund të dërgojnë mesazhe zanore”,- tha Frashëri.
Në Mars, “Vodafone” luajti mesazhin zanor të Ramës për të gjithë pajtimtarët e tij dhe ata të kompanive të tjera që telefonuan një numër “Vodafone”.
Në mesazh, Rama paralajmëronte qytetarët të mos i besonin mediave, dhe të mbroheshin nga Covid-19.
Jo pa të drejtë, u hodhën akuza se “Vodafone” u vu në shërbim të propagandës së Ramës.
AKEP dhe Frashëri nuk e kanë sqaruar bazën ligjore dhe procedurën e ndjekur nga Vodafone dhe kompani të tjera.
Por pajtimtarët e kësaj kompanie u detyruan të dëgjonin audio-mesazhin e Ramës para çdo telefonate.
Frashëri e justifikoi veprimin duke thënë se, “edhe në Kanada, shteti ua besoi artistëve shpërndarjen e mesazheve, në Francë ata ia lanë prefektëve”.
Ligji për Mbrojtjen e Privatësisë lejon zbulimin e numrave privatë në raste të parandalimit të sëmundjeve.
Sidoqoftë, numrat duhet të përdoren nga personeli i autorizuar i institucioneve mjekësore publike të certifikuara për të ruajtur dhe trajtuar me kujdes të dhënat.
Duke supozuar se “Vodafone” nuk i zbuloi listat e numrave te stafi i Kryeministrit, por programoi mesazhin zanor të Ramës për t’u luajtur para çdo thirrje, kompania dhe qeveria duhet të paktën të kishin bërë publike arsyet ligjore për veprimet e tyre.
/Gazetaatdheu.com/
