Mbrëmjen e kaluar Policia ka arrestuar një person, si të dyshuar për vrasjen e dyfishtë të 30 majit në Laç, ku mbetën të vdekur Bujar Lika dhe Paulin Gjergji. Ende nuk dihet identiteti i të arrestuarit, por burime për mediat, raportojnë se personi është identifikuar me inicialet E.D., 30 vjeç.
Ai ka shkuar i plagosur në spital mbëmjen e kaluar. Bluzat e bardha thuhet se kanë njoftuar policinë, ndërsa kanë dalë në rezultatin se i riu është plagosur rreth 20 ditë më parë. Kujtojmë se deri më tani, Kreshnik Tusha është i vetmi i arrestuar për vrasjen e dyfishtë në Laç. Ai është lënë në arrest me burg.
Masa i është komunikuar në Spitalin e Traumës në Tiranë pasi ai ishte plagosur natën që ndodhi ngjarja. Fillimisht, nga ngjarja e rëndë i vdekur në vend mbeti Bujar Lika, ndërsa i plagosur mbeti Paulin Gjergji i cili ndërroi jetë pak orë më vonë pas ngjarjes në spital. Kujtojmë se Lika, njihej si mik i ngushtë me Ervis Martinajn. Ndërsa Paulin Gjergji, biznesmen i njohur.
Burime për mediat bëjnë me dije se 4 dyshohet të kenë qenë personat që kanë hapur zjarr ndaj dy biznesmenëve. Kamerat e sigurisë të biznesit ku ndodhi ngjarja kanë filmuar gjithçka, ndërkohë në pamjet filmike tregohet se autorët kanë qenë të maskuar dhe të veshur si policë.
Ka shumë dyshime se ky atentat ka qenë i mirëorganizuar dhe paguar nga persona të tjerë, që kanë konflikte me Bujar Hasanin dhe Paulin Gjergjin. Po të njëjtat burime, bëjnë me dije se autorët kanë thirrur në emër Bujar Hasanin alias Lika, duke i thënë: “Ti je Bujari?”, e më pas kanë qëlluar drejt tij duke e lënë të vdekur në vend. Dyshohet se autorët kanë lidhje me familjet në Nikël, ku nuk përjashtohet pista e vrasësve me pagesë nga kjo zonë.
Si ndodhi ngjarja në orët e vona të 30 majit
Teksa Bujar Hasani alias Lika dhe Paulin Gjergji alias Markaj, ndodheshin përpara një hoteli në autostradën Mamurras-Lezhë, disa persona janë afruar në hollin përpara hotelit duke qëlluar me breshëri. Deri më tani si autor i përfshirë në ngjarje është vetëm Kreshnik Tusha, 21-vjeçari i cili mori tre plumba në këmbë si pasojë e kundërpërgjigjes me armë nga viktima Bujar Lika. Në këtë moment, autorët largohen nga vendngjarja, ndërsa Tusha, me tre plumba në këmbë, është dërguar nga familjarët e tij drejt spitalit për të marrë ndihmë mjekësore.
Policia ka shoqëruar mbi 30 persona lidhur me ngjarjen e rëndë të ndodhur mbrëmjen e së shtunës në Gjorm të Kurbinit.
Pritet që në ditët në vijim Kreshnik Tusha person i papunë nga Laçi, të merret në pyetje dhe t’i caktohet masa e sigurisë nga Gjykata e Kurbinit. Ende policia dhe prokuroria e Laçit nuk ka një version zyrtar se kush ishte objektivi i këtij sulmi me armë, që përfundoi me dy të vrarë.
Një person i pestë vëzhgoi lëvizjet e biznesmenëve
Mësohet se i përfshirë në ngjarje është dhe një person i pestë, i cili ende nuk është identifikuar. Dyshohet se roli i tij ishte të vëzhgonte dy biznesmenët dhe lëvizjet e tyre përpara se të kryhej atentati. Një atentat në dukje i mirëorganizuar.
Pista e hetimit
E shkuara e Bujar Likës, mikut të Ervis Martinajt
Deri tani psita e hetimit mbetet e shkuara e viktimës Bujar Lika. 37-vjeçari rezulton një emër i njohur për policinë, pasi në vitin 2015 u përfshi në vrasjen e Enton Nikajt në Dajt, ndërsa një vit më pas u dënua nga gjykata me një vit burg.
Për vrasjen e Nikajt u dënuan Emiljano Tasho 16 vjet, Erjon Biraci 2 vjet, Ervis Martinaj 1 vit e 4 muaj, Mirsad Kuçana 1 vit e 4 muaj dhe Bujar Hasani 1 vit burg.
Viktima dyshohet se ishte mik i ngushtë i Ervis Martinajt, gjithashtu emër i njohur pas ngjarjes së 2018 në Bllok. Pranë trupit të viktimës që njihej me dy mbiemra, Lika e Hasani mbrëmjen e së shtunës u gjet një armë, që dyshohet se u përdor gjatë shkëmbimit të zjarrit.
Hasani njihet si person me precedentë penale, por në disa raste ka mundur t’ia hedhe drejtësisë. Në ngjarjen ku mbeti i vrarë Enton Nikaj në zonën e Dajtit në Tiranë, Bujar Hasani, u deklarua i pafajshëm nga gjykata e Apelit Tiranë.
Burime për mediat bëjnë me dije se Lika kishte në pronësi një lokal në ish-Bllok, lokal të cilin e kishte kaluar në emër të motrës së tij.
Viktima e dytë, Paulin Gjergji alias Markaj
Paulin Gjergji alias Markaj, pronar i disa bizneseve në Shqipëri, nuk mundi t’i mbijetojë kësaj ngjarje. Gjergji nuk dihet me saktësi nëse ka qenë rastësisht në këtë ngjarje apo ka qenë edhe ai objektivi.
Mësohet se edhe Gjergji ishte i njohur në fushën e biznseve. Në pronësi të Paulin Gjergjit alias Markaj është kompania “Antoni New-York”, kompania e kazinove “Intertronic” dhe kompania e tregtimit të gazit në Shqipëri “Petro Gaz Albania-n”.
Sipas burimeve të policisë Paulin Gjergji, ka qenë dhe pronar i ish-Bar Restorant “Nicolini” në afërsi të ish-hotel “Dajtit”./Gazetaatdheu.com/
