Policia ka vënë në pranga një 32-vjeçar, i cili dyshohet se mund të jetë i përfshirë në vrasjen e Hekuran Billës më 11 qershor tek “Komuna e Parisit” në kryeqytet.
Raportohet se në pranga ka përfunduar i riu nga Shkodra, i identifikuar si Andi Agraja.
Policia, njofton se 32-vjeçarit iu gjet një armë zjarri pas një kontrolli në një lokal. Burime zyrtare, bëjnë me dije se i riu ka tentuar të arratiset por nuk ia ka dalë.
Kujtojmë se mbrëmjen e 11 qershorit, Hekuran Billa u ekzekutua me 11 plumba teksa ndodhej në automjetin e tij tip BMW X6 në ‘Komunën e Parisit’.
Ngjarja e rëndë raportohet se ndodhi për hakmarrje. Në vitin 2006, Hekuran Billa, vrau me armë zjarri Prel Markun në Angli. Një nga autorët e dyshuar të vrasjes së Billës është vëllai i Prel Markut, Viktor Marku. Ky i fundit i arrestuar nga policia.
Si i dyshuar në atentatin ndaj Billës, është edhe Sebastian Mali. 22 vjeçari, banues në Tiranë, është nipi i Prel Markut që është vrarë nga Billa në vitin 2006 në Angli. Ai dyshohet se ka bashkëpunuar me Viktor Markun për të marrë hakun e dajës. Edhe i riu është arrestuar nga policia.
Kujtojmë se Viktor Marku, si i dyshuar kryesor për vrasjen e Hekuran Billës, u kap në Malin e Zi nga policia malazeze, si dhe u bë i mundur arrestimi i tij në pikën e kalimit kufitar Hani i Hotit, nga ana e strukturave të Policisë së Shtetit.
Njoftimi i Policisë:
Krahas veprimeve hetimore vijojnë kontrollet për kapjen dhe shoqërimin e personave të tjerë që mund të kenë dijeni apo mund të jenë të implikuar në këtë ngjarje.
Gjatë kontrolleve të shtuara është kapur në një lokal, një shtetas që mbante armë zjarri pistoletë me vete dhe tentoi të largohej me vrap, por u kap dhe u arrestua në flagrancë nga Policia.
Nga shërbimet e Policisë në Sektorin për Hetimin e Krimeve të Rënda ndaj Jetës dhe Pronës dhe në Sektorin e Operacioneve Speciale në Drejtorinë Vendore të Policisë Tiranë janë ushtruar kontrolle të shumta në disa ambiente lokalesh, banesa dhe servise automjetesh.
Si rezultat i kontrollit të ushtruar në një lokal, një shtetas, në momentin e ndërhyrjes së shërbimeve të Policisë është larguar me vrap, duke hedhur në tokë një çantë, brenda së cilës Policia gjeti dhe sekuestroi një armë zjarri tip pistoletë, me një krehër me 7 fishekë kalibër 9 mm.
Shërbimet e Policisë kanë vijuar ndjekjen dhe pas disa minutash kanë bërë të mundur kapjen dhe arrestimin në flagrancë të shtetasit A. A., 32 vjeç, banues në Shkodër. Materialet i kaluan Prokurorisë së Rrethit Gjyqësor Tiranë, për veprime të mëtejshme, për veprën penale “Armëmbajtja pa leje”, për të cilën parashikohet dënimi deri në 7 vjet burgim.
Sektori për Hetimin e Krimeve të Rënda ndaj Jetës dhe Pronës, në koordinim me Departamentin e Policisë Kriminale dhe nën drejtimin e Prokurorisë së Rrethit Gjyqësor Tiranë vijon veprimet intensive për dokumentinin e plotë të vrasjes së shtetasit H. B., identifikimin, kapjen dhe arrestimin e personave të tjerë të implikuar në këtë ngjarje.
Më herët, nga DVP Tiranë, u identifikua dhe u prangos 22-vjeçari S. M. (nipi i shtetasit V. M.), i dyshuar si bashkëpunëtor në vrasje.
Më pas, falë bashkëpunimit të shkëlqyer mes Policisë së Shtetit dhe Policisë malazeze, duke shkëmbyer në kohë reale informacione të grumbulluara nga DVP Tiranë, për vendndodhjen e shtetasit V. M., i dyshuar si autor kryesor për vrasjen e shtetasit H. B., u bë e mundur kapja në Malin e Zi, nga Policia malazeze, e shtetasit V. M. dhe më pas arrestimi i tij në pikën e kalimit kufitar Hani i Hotit, nga ana e strukturave të Policisë së Shtetit.
