Autoritetet janë ngritur në këmbë për zbardhjen sa më parë të shqiptarit Ergys Dashi në Ekuador. Këtë të hënë, presidenti Guillermo Lasso ka zhvilluar një takim me drejtorin e policisë dhe kryebashkiaken e Guayaquil-it, Cynthia Viteri.
Viteri deklaroi se para dy ditësh ka dorëzuar në qeveri bazën e të dhënave në mënyrë që kamerat për njohjen e fytyrës të funksionojnë siç duhet. Pritet që kamerat të shtohen në 15 mijë.
Sipas kryebashkiakes Viteri, një kërkesë që ka mbetur pezull është edhe autorizimi i përdorimit të armëve jovdekjeprurëse për agjentët që po trajnohen për të mbështetur punën e policisë. Kujtojmë që Ergys Dashi u ekzekutua me një plumb në kokë mbrëmjen e së shtunës në Guayaquil të Ekuadorit. Autori, i cili mbante në dorë një buqetë me lule, shkoi me vrap në drejtim të tryezës ku ai ishte ulur, e qëlloi në kokë dhe më pas u largua.
