Vrau kunatin 15 vite më parë dhe mori peng një person me Durim Bamin, ekstradohet nga Italia Dritan Karaj

Vrau kunatin 15 vite më parë dhe…

Ekstradohet nga Italia drejt Shqipërisë Dritan Karaj, 39 vjeç, i shumëkërkuar nga drejtësia shqiptare, i dënuar me 19 vjet burg, për vepra të rënda kundër personit.

Mësohet se ky person është arratisur nga Shqipëria pasi ka vrarë kunatin e tij, por po ashtu ka bashkëpunuar edhe me një personazh të njohur për policinë dhe jo vetëm, Durim Bamin, me të cilin ka marrë pjesë në një pengmarrje në Vlorë.

Karaj ishte i shpallur në kërkim ndërkombëtar, sepse Gjykata e Krimeve të Rënda, e ka dënuar me 19 vjet burg për veprën penale “Vrasja”, ”Prodhimin dhe mbajtja pa lejë e armëve luftarake dhe municioni” dhe ”Rrëmbim personi”.

Në Fushë-Krujë, në 11 mars 2004, i pandehuri Dritan Karaj ka vrarë me armë zjarri kunatin e tij dhe është larguar nga vendngjarja.

Gjatë periudhës që Karaj qëndronte i fshehur, së bashku me Durim Bamin i kanë hequr padrejtësisht lirinë për qëllim përfitimi të një shume prej 7 mijë eurosh, Edmond Tahirajt.

Për këto vepra penale i pandehuri është hetuar e gjykuar në mungesë dhe është deklaruar fajtor duke u dënuar me vendim të formës së prerë.

Në janar të një viti më parë Karaj u arrestua në Bergamo me qëllim ekstradimin në vendin tonë.

Njoftimi i plotë:

Në vijim të bashkëpunimit mes Interpol Tirana dhe homologëve për kapjen dhe ekstradimin e personave të shpallur në kërkim ndërkombëtar, nga ZQK Interpol Tirana u ekstradua nga Italia shtetasi Dritan Karaj alias Ethem Ademi, 39 vjeç, lindur në Krujë.

Shtetasi Dritan Karaj ishte shpallur ne kërkim ndërkombëtar nga ZQK Tirana, pasi Gjykata e Krimeve të Rënda e ka dënuar me 19 vjet burg, për kryerjen e veprave penale “Vrasja në rrethana të tjera cilësuese”, “Armëmbajtja pa leje” dhe “Rrembimi ose mbajtja peng e personit”.

Gjithashtu, po nga Interpol Tirana u krye ekstradimi nga Franca drejt vendit tonë, i shtetasit shqiptar Ilir Kello, 45 vjeç.

Ky shtetas ishte shpallur në kërkim ndërkombëtar, pasi Gjykata e Rrethit Gjyqësor Korçë e ka dënuar me 6 vjet burgim, për veprën penale ”Mashtrimi”./GazetaAtdheu.com/

Më Të Klikuarat

Lajmet e fundit