Një gjykatë në New York, ka vendosur të dënojë me 8 dënime të përjetshme një mbështetës të grupit militant të Shtetit Islamik. Militanti vrau 8 këmbësorë e çiklistë në vitin 2017 me kamionin e tij të marrë me qera. Pesë nga viktimat ishin turistë nga Argjentina, një grua 31-vjeçare ishte nga Belgjika. Edhe dy amerikanë ishin në mesin e viktimave, teksa 12 të tjerë u plagosën.
Sipas mediave të huaja, shtetasi Sayfullo Saipov, u dënua nga drejtësia amerikane me plot 260 vjet. Megjithë aksidentin fatal, ai nuk shfaqi asnjë shenjë pendese në kohën e gjykimit, pavarësisht se në sallë ndodheshin edhe familjarë të viktimave. 35-vjeçari kishte thirrur “Zoti është i madh” në gjuhën arabe në kohën kur kreu sulmin.
Pasi doli nga kamioni, ai u qëllua nga policia. Sipas tij, kryerja e një akti të tillë do ta bënte atë pjesë të Shtetit Islamik. Shtetasi uzbek, Saipov pritet të vuajë dënimin në një burg të sigurisë së lartë në Kolorado.