Granit Xhaka ka shprehur vendosmërinë për t’u bashkuar me Milanin, ndërsa klubi italian duhet të përgatitet të paguajë 15 milionë euro për kartonin e tij.
Mesfushori shqiptar që aktivizohet te Bayer Leverkusen duket se ka marrë tashmë vendimin për të ardhmen e tij. Ai dëshiron të largohet nga Bundesliga dhe të transferohet në Serie A, me synimin për t’u bërë pjesë e projektit të ri të Milanit.
Situata te Leverkuseni nuk është aspak e qëndrueshme. Klubi ka humbur disa prej lojtarëve më të rëndësishëm gjatë këtij afati kalimtar dhe, me largimin e mundshëm të Xhakës, kriza mund të thellohet edhe më tej.
Burime të afërta me klubin gjerman theksojnë se dëshira e futbollistit është e qartë dhe e padiskutueshme. Ai nuk ka ndërmend të kthehet prapa në vendimin e marrë dhe tashmë topi është në fushën e Milanit.
Kuqezinjtë duhet të veprojnë shpejt nëse duan të sigurojnë shërbimet e 31-vjeçarit. Bayer Leverkusen ka vendosur çmimin prej 15 milionë eurosh dhe nuk pritet të bëjë ulje për një nga figurat më me peshë të mesfushës.
Mediat italiane shkruajnë se drejtuesit e Milanit po shqyrtojnë mënyrat për të mbyllur marrëveshjen sa më parë, pasi trajneri i ri dëshiron të ndërtojë një skuadër të fortë rreth lojtarëve me përvojë dhe personalitet.
Nëse transferimi konkretizohet, Xhaka do të rikthehet në një kampionat që kërkon shumë taktikisht, por që i përshtatet stilit të tij të lojës. Kjo lëvizje do të ishte një përforcim i rëndësishëm për Milanin në ndërtimin e një skuadre konkurruese në Europë.
Ndërkohë, pritet që bisedimet mes dy klubeve të intensifikohen në ditët në vijim, pasi Milani nuk dëshiron të humbasë kohë në këtë merkato.
