Një moment tensioni është regjistruar mbrëmjen e sotme gjatë protestës së 33-të qytetare para Kryeministrisë, ku një grup protestuesish u përplas verbalisht me ekipin e televizionit Top News.
Qytetarët dëgjohen teksa i drejtohen gazetares dhe operatorit me thirrje si: “Zhdukuni!” dhe “Ikni!”, duke kundërshtuar praninë e tyre në protestë. Situata u tensionua për disa çaste, ndërsa raportimi u shoqërua me fyerje dhe shtyrje.
Ngjarja ndodhi në një kohë kur protesta ka hyrë në ditën e saj të 33-të, me mijëra qytetarë që vijojnë të dalin çdo mbrëmje në rrugët e Tiranës për të shprehur pakënaqësitë ndaj qeverisë dhe klasës politike.
Nga ana tjetër, kryeministri Edi Rama ka përsëritur edhe sot se dorëheqja e tij nuk është një opsion, pavarësisht kërkesave të protestuesve që prej më shumë se një muaji kërkojnë largimin e tij nga detyra.
