Situata në Krujë vijon të jetë kritike, teksa zjarri është përhapur në drejtim të zonave të banuara dhe ka detyruar autoritetet të nisin evakuimin e banorëve në lagjen “Abaze”.
Flakët, të favorizuara nga erërat e forta dhe bimësia e thatë, po avancojnë drejt banesave, duke rritur ndjeshëm rrezikun për jetën e qytetarëve dhe pronat e tyre. Banorët janë larguar nga shtëpitë dhe po qëndrojnë në rrugë, ndërsa situata vijon të monitorohet nga afër.
Paralelisht, është rikthyer ndërhyrja nga ajri, me qëllim goditjen e vatrave aktive dhe frenimin e përhapjes së flakëve.
Forcat zjarrfikëse dhe strukturat e tjera në terren po punojnë për izolimin e zjarrit, ndërsa banorëve u është bërë thirrje të zbatojnë udhëzimet e autoriteteve dhe të largohen menjëherë nga zonat që paraqesin rrezik.
Situata mbetet dinamike, ndërsa përparimi i flakëve drejt banesave ka shtuar shqetësimin për banorët e zonës.
