Qeveria zvicerane paraqiti sot një projekt-ligj në parlament që kërkon gjoba deri në 1000 franga zvicerane (1005 dollarë) për ata që shkelin ndalimin kombëtar të mbulimit të fytyrës ndërsa përpiqet të zbatojë ligjin e “ndalimit të burkës”, raporton Zougla.gr.
Burka është një veshje tipike myslimane, e zezë, e cila përdoret nga femrat, por ka pasur raste që është përdorur për kamuflim dhe nga ekstremistë të ISIS.
Pas konsultimeve, kabineti mbajti një qëndrim më të moderuar në lidhje me kërkesat e bëra për penalizimin e veprës dhe vendosjen e një gjobe deri në 10,000 franga zvicerane, raporton Zougla.gr.
Drafti përfshinte disa përjashtime nga ligji.
Qeveria propozoi që ndalimi të mos zbatohej për avionët, vendet diplomatike dhe vendet e adhurimit. Mbulimet në lidhje me shëndetin, sigurinë, kushtet klimatike dhe zakonet lokale do të vazhdojnë të jenë të pranueshme. Shfaqjet artistike dhe reklamat do të përjashtohen.
Maskat që konsiderohen të nevojshme për të mbrojtur një person gjatë ushtrimit të të drejtave të tyre themelore për shprehje dhe tubim do të lejohen gjithashtu, me kusht që autoritetet të kenë dhënë miratimin e tyre dhe të respektohet rendi publik.
Përkrahësit e ndalimit i quajnë mbulesat e fytyrës një simbol të islamit ekstrem politik. Organizatat myslimane e dënuan referendumin si një proces diskriminues dhe u zotuan të ndërmarrin veprime ligjore.
Franca ndaloi mbulimin e plotë të fytyrës në vende publike në vitin 2011, dhe Danimarka, Austria, Holanda dhe Bullgaria kanë ndalime të plota ose të pjesshme për mbulimin e fytyrës në vende publike.
Myslimanët përbëjnë rreth 5% të popullsisë zvicerane, shumica me rrënjë në Turqi, Bosnjë dhe Kosovë.
